LADINO

LOS PASEOS AL BOSFOR

Cada uno de entre nozotros ke nasio i se engrandesio en Estambol i bivio ayi en los anyos 50-60 i antes de esto, se akodra sin duda de los paseos ke se azian al Bosfor en los mezes d'enverano.
En akeyos dias kuando dinguno, no se sonyava de dar un salto por 3 o 4 dias a uno de los paizes de Evropa, sin avlar de vajes a las Amerikas, al Leshano Oriente i mas ande no..., para mozotros las kreaturas, estos paseos eran komo el mijor viaje del mundo. La alegria era muy grande i ainda mas la emosion...
Kuando muestros djenitores (padres) kedavan de akordo kon otras famiyas mas de salir a un semejante "piknik" asperavamos kon despasencia ke despunte el dia. Todos los aparejos se azian la noche antes: sovre la meza de la kuzina o de la kamareta de komer se metian los chinis, los pirones i kuchiyos, un mantel, shavon (jabón) para lavar los platos i las kupas, una bala, una kuedra para saltar ke servia tambien para azer una kuna, i una manta para la kuna.
El menu de estos paseos era bien riko: para el dezayuno mos yevavamos burekas de kezo, kezadikas de berendjena i bulemas de espinaka, sin olvidar el kezo blanko, el kashkaval, las azetunas pretas i los guevos haminados. Las komidas preferadas de estos paseos eran las albondigas de karne fritas, arroz kon kaldo de tomat fresko, pimyentones reyenados kon arroz, berendjena frita, pishkado frito, pipinos i tomates para la salata ke se aprontava en el lugar, i si todo esto no abastava avrian tambien kutis de sardela (latas de sardina)
Esto todo se metia en chantas (canastas) i a las 6 de la manyana o "alas siete madrugadas", komo dizia mi nona Zimbul, saliamos a kamino. Estos paseos eran komo una aventura. En akeyos dias ¿ken tenia otomobil privado? i tan demprano no avia ni taksi ni otobuses. El solo remedio era de azer el kamino a pie asta el kiupri (el ponte de Galata onde se topavan las eskalas para el Bosfor) i alkansar al primer vapor para pueder profitar (aprovechar) el dia. Ni los chikos ni los grandes se keshavan del pezgo (quejaban del peso) de las chantas i del largo kamino ke se azia asta el kiupri, abashando por Yüksekkaldirim.
Despues ke se merkavan los lilyetos asperavamos al lado de las kandjelas de fieroo, ke en efekto eran dos grandes puertas ke se avrian kuando el vapor akostava a la eskala. En akeyos dias los vapores eran chikos i no muy rapidos i akostavan a todas las eskalas en las dos kostas del Bosfor aziendo zig-zag. Este era un viaje maraviyozo ke a las vezes durava mas de dos oras en una sola direksion.
Los lugares preferados para estos paseos eran Hünkar i Circir ande avia manaderos de agua buena, i Rumeli Kavak, la ultima eskala en la parte evropea del Bosfor, ande las aguas de la mar Marmara se bezan kon las aguas de la Mar Preta.
Abashando del vapor, la primera koza era de merkar karpuzes i pan fresko. Para suvir a Hünkar o a Circir alkilava un payton o talika komo lo yamavan en Estambol, i despues de oras en el kamino se yegava enfin al lugar del piknik. Estos eran grandes kafes kon mezas i siyas, i un restorante o seria mas djusto dizir una kafeteria, onde se puedia merkar berevajes kaentes (bebidas calientes) i yelados o adjustar algo a las komidas ke se traian de kaza. Las aguas de los manaderos korrian entre los arvoles i las plantas ke kuvrian las kolinas i yegavan asta las mezas onde nos sentavamos. Los karpuzes se metian alientro de estas aguas freskas para yelarlos.
Se disho paseo, se disho komer. El dia empesava kon el dezayuno. Asta la komida de medio dia pasavamos la ora djugando, kaminando entre la arvoleria i arankando flores ke traiyamos a kaza kuando ya estavan amurchadas. Los "grandes" djugavan kartas, tavli (shesh-besh) i azian sohbet. Entre un pranso al otro se metia sovre la meza igos freskos i dulzes komo la miel, sheftalis, el karpuz ke entremientres ya se avia yelado i otras frutas mas, para mojar la boka. Oras de tadre, antes de salir a kamino, se komia lo ke kedo del dezayno. En el kamino de retorno las chantas ya estavan mas livianas ma mozotros estavamos un poko mas pezgados (pesados). Tornavamos a kaza kuando ua eskuresia, kansados ma muy kontentes i alegres, asperando kon despasensia al sigiente paseo.

Relatado por Zelda Ovadia para Aki Yerushalayim